اسلام آباد: پاکستان اور سعودی عرب کے درمیان تاریخی معاہدے کی خوشی میں وفاقی دارالحکومت میں چراغاں شروع کر دیا گیا ہے جسے وزیراعظم کی ہدایت کے مطابق 23 ستمبر تک جاری رکھا جائے گا۔
سرکاری اور نجی عمارتیں سعودی عرب کے پرچم کے سبز رنگ کی روشنیوں سے سجائی گئی ہیں۔ ریڈ زون اور شہر کی مختلف شاہراہوں پر سعودی بادشاہ، ولی عہد، وزیراعظم شہباز شریف اور فیلڈ مارشل عاصم منیر کی تصاویر والے قدآدم ہورڈنگ لگائے گئے ہیں جبکہ پاکستان اور سعودی عرب کے پرچم بھی بڑی تعداد میں عمارتوں اور شاہراہوں پر لہرا رہے ہیں۔
شہری وزیراعظم شہباز شریف کے سعودی عرب میں شاندار استقبال اور دونوں ممالک کے درمیان معاہدے پر خوشی کا اظہار کر رہے ہیں۔ ایکسپریس نیوز سے گفتگو میں شہریوں نے کہا کہ سعودی عرب کی حفاظت ہمارے لیے باعث فخر ہے، چاہے ہمیں دنیاوی فائدہ نہ بھی ملے، ہم پاک سرزمین کی حفاظت کے لیے اپنی جان قربان کرنے کے لیے تیار ہیں۔
شہریوں کا مزید کہنا تھا کہ جیسے اسرائیل ایک کے بعد ایک مسلمان ملک پر حملہ کر رہا ہے، اگر مسلم ممالک کا متحدہ بلاک بن جائے تو کوئی بھی ملک، اسرائیل بھی شامل، ایسی کارروائی کی ہمت نہیں کر سکے گا۔
