اسلام آباد: وفاقی وزیر داخلہ محسن نقوی نے ڈپلومیٹک انکلیو میں سعودی عرب کے سفارتخانے کا دورہ کیا، جہاں سعودی سفیر نواف بن سعید احمد المالکی نے ان کا پرتپاک استقبال کیا۔
ملاقات میں پاک سعودی تعلقات اور باہمی دلچسپی کے امور پر تفصیلی تبادلہ خیال کیا گیا۔ اس موقع پر محسن نقوی نے کہا کہ پاکستان اور سعودی عرب کے تعلقات ہمیشہ ہر آزمائش پر پورے اترے ہیں۔ انہوں نے پاک بھارت کشیدگی کے دوران سعودی عرب کے مؤثر اور مخلصانہ کردار پر سعودی قیادت اور سفیر کا شکریہ ادا کیا اور کہا کہ سعودی عرب نے ہر موقع پر پاکستان کا بھرپور ساتھ دیا۔
وزیر داخلہ نے مزید بتایا کہ سعودی عرب میں بھیک مانگنے والے گروہوں کے خلاف سخت کریک ڈاؤن جاری ہے اور زیرو ٹالرنس پالیسی اپنائی گئی ہے۔ اس موقع پر سعودی سفیر نواف بن سعید احمد المالکی نے کہا کہ پاکستان ہمارا برادر ملک ہے اور سعودی عرب اس کے ساتھ اپنے تعلقات کو خصوصی اہمیت دیتا ہے۔
