وزیر اعلیٰ پنجاب نے ملتان اور جلال پور پیر والا کا فضائی دورہ کیا اور سیلاب سے متاثرہ علاقوں کا معائنہ کیا۔
یہ وزیر اعلیٰ کا ملتان کا دوسرا دورہ ہے، انہوں نے 3 ستمبر کو بھی ملتان کا دورہ کیا تھا۔ مریم نواز نے بھی فضائی جائزے کے دوران متاثرہ علاقوں کی صورتحال دیکھی۔
یاد رہے کہ بھارت کی جانب سے آبی جارحیت جاری ہے، دریائے ستلج میں مزید پانی چھوڑا گیا اور دریائے چناب میں بھی پانی کا بہاؤ برقرار رہنے سے جنوبی پنجاب کی صورتحال تشویشناک ہے۔
وزیر اعظم شہباز شریف کی خصوصی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) کا سیلاب متاثرہ علاقوں میں امدادی آپریشن جاری ہے۔
این ڈی ایم اے کے مطابق پنجاب کے متاثرہ علاقوں کے لیے مزید امدادی سامان روانہ کیا گیا۔ اسلام آباد میں این ڈی ایم اے کے ویئر ہاؤس سے آج بدھ کو 20 ٹرکوں پر مشتمل قافلہ روانہ ہوا، جو پی ڈی ایم اے پنجاب کے حوالے کیا جائے گا۔
امدادی سامان میں ہیٹرز، فولڈنگ بیڈز، رضائیاں، کمبل، پانی کے کین اور دیگر ضروری اشیاء شامل ہیں۔ قبل ازیں 9 ستمبر کو بھی 10 ٹرکوں کا امدادی سامان پنجاب بھیجا جا چکا ہے۔ اب تک پنجاب کو فراہم کیے گئے 1660 ٹن امدادی سامان میں خیمے، مچھر دانیاں، پانی کے فلٹریشن پلانٹس، کشتیاں اور دیگر ضروری سامان شامل ہیں۔
این ڈی ایم اے تمام متعلقہ سول اور عسکری اداروں کے ساتھ رابطے میں ہے اور جاری امدادی کارروائیوں کی مکمل نگرانی کر رہا ہے۔
