لاہور: وزیراعلیٰ مریم نواز شریف کی ہدایت پر پنجاب میں جنگلات کی کٹائی اور لکڑی کی نیلامی پر فوری پابندی عائد کر دی گئی ہے۔ پنجاب حکومت نے صوبے کی تاریخ میں پہلی بار جنگل کی لکڑی کی نیلامی کا روایتی نظام ختم کرنے کا فیصلہ کیا ہے اور نئے شفاف قواعد و ضوابط جدید ٹیکنالوجی اور میپنگ کی مدد سے مرتب کیے جائیں گے۔
حکم نامے کے مطابق جنگلات کی ہر قسم کی لکڑی، بشمول ایندھن، کی نیلامی پر تاحکم ثانی پابندی عائد کر دی گئی ہے۔ سابقہ نظام میں نیلامی کے نام پر درخت بے رحمی سے کاٹے جاتے اور حاصل شدہ رقم چند افراد کی جیبوں میں چلی جاتی تھی۔
وزیراعلیٰ نے جنگلات، جنگلی حیات اور ماہی پروری کے محکمے کے ڈائریکٹر جنرل کو حکم دیا ہے کہ پابندی پر عمل درآمد یقینی بنایا جائے۔ مستقبل میں نیلامی سے قبل جنگلات کی اعلیٰ معیار کی ویڈیوز اور تصاویر بھی پیش کی جائیں گی تاکہ شفافیت برقرار رہے اور زمین اور ماحول کے تحفظ کو یقینی بنایا جا سکے۔
