پاکستان کرکٹ ٹیم کے سابق کپتان محمد حفیظ نے پی سی بی کے سینٹرل کنٹریکٹ پر سوال اٹھاتے ہوئے حیرت کا اظہار کیا ہے کہ کسی بھی کھلاڑی کو کیٹیگری اے میں شامل نہیں کیا گیا۔
سماجی رابطے کی ویب سائٹ ایکس پر جاری بیان میں محمد حفیظ نے ٹیسٹ ٹیم کے کپتان کو ڈی کیٹیگری میں رکھنے پر بورڈ کو تنقید کا نشانہ بنایا۔
انہوں نے کہا کہ وہ کھلاڑی جنہوں نے پاکستان کو ٹیسٹ میچز اور اہم سیریز میں فتوحات دلائیں، جیسے ساجد خان، نعمان علی اور سعود شکیل، انہیں محض سی کیٹیگری میں رکھا گیا ہے، جو سمجھ سے بالاتر ہے۔
محمد حفیظ کے مطابق ٹیسٹ اور فرسٹ کلاس کرکٹ کی قدر میں کمی ہی اس زوال کی بنیادی وجہ ہے۔ یاد رہے کہ گزشتہ روز پی سی بی نے 30 کھلاڑیوں کو سینٹرل کنٹریکٹ میں شامل کیا تھا، مگر کسی کو بھی اے کیٹیگری میں جگہ نہ مل سکی۔