ملتان: وفاقی وزیر اور چیئرمین کشمیر کمیٹی رانا قاسم نون نے شجاع آباد کے متاثرہ علاقوں کا ہنگامی دورہ کیا اور بھوپت والا بند کی صورتحال کا جائزہ لیا۔
انہوں نے محکمہ ایریگیشن کی ناقص کارکردگی اور غفلت پر شدید برہمی کا اظہار کیا اور کہا کہ اتنے سنگین حالات کے باوجود بند ٹوٹنے کی بنیادی وجہ محکمہ کی لاپرواہی ہے۔
شجاع آباد شہر کو ممکنہ سیلاب سے بچانے کے لیے سیکنڈ دفاعی لائن پر کام تیزی سے جاری ہے۔ بستی پریت اور موضع خیرپور کے علاقوں میں بند مضبوط بنانے کے لیے ضلعی انتظامیہ اور ریسکیو ادارے تمام وسائل استعمال کر رہے ہیں جبکہ شہر کو بچانے کے لیے ہائی الرٹ جاری ہے۔
وفاقی وزیر کے استفسار پر صوبائی وزیر کاظم پیرزادہ بھی فوری طور پر شجاع آباد پہنچ گئے اور مؤثر اقدامات کی ہدایت کی۔ ان کا کہنا تھا کہ سیکنڈ ڈیفنس لائن کو مضبوط بنانے میں کوئی کوتاہی برداشت نہیں کی جائے گی۔
اسسٹنٹ کمشنر شجاع آباد کے مطابق بھوپت والا بند کے قریبی علاقوں جیسے ماہڑہ، محرم بستی، نئی بستی، بنگالہ موڑ اور نواں شہر سے آبادی اور مویشیوں کو محفوظ مقامات پر منتقل کر دیا گیا ہے اور ریسکیو ٹیمیں کسی جانی یا مالی نقصان سے بچانے کی ہر ممکن کوشش کر رہی ہیں۔
ضلعی انتظامیہ، ریسکیو 1122، محکمہ سول ڈیفنس اور دیگر ادارے شجاع آباد شہر کو بچانے کے لیے دن رات متحرک ہیں اور مقامی آبادی سے بھی تعاون کی اپیل کی گئی ہے۔ موجودہ صورتحال کے پیش نظر شہر کے اطراف میں مزید بندوں کو مضبوط کرنے کا کام تیزی سے جاری ہے تاکہ ممکنہ خطرات سے نمٹا جا سکے۔
