لاہور: پاکستان ٹیسٹ ٹیم کے ہیڈ کوچ سرفراز احمد نے سابق کپتان شان مسعود پر مکمل اعتماد کا اظہار کرتے ہوئے کہا ہے کہ کپتانی سے الگ ہونے کے باوجود وہ بطور کھلاڑی قومی ٹیم کی کامیابی میں اہم کردار ادا کریں گے۔
ویسٹ انڈیز روانگی سے قبل میڈیا سے گفتگو کرتے ہوئے سرفراز احمد نے بتایا کہ ان کی شان مسعود سے تفصیلی بات چیت ہوئی ہے اور وہ پُراعتماد نظر آئے۔ انہوں نے کہا کہ اگرچہ شان کو معمولی ہیم اسٹرنگ کی تکلیف کا سامنا تھا، تاہم ان کا جذبہ اور پیشہ ورانہ رویہ قابلِ تعریف ہے۔
ہیڈ کوچ کے مطابق قومی ٹیم نے گزشتہ ایک ماہ کے دوران لاہور اور راولپنڈی میں بھرپور تربیتی کیمپ لگائے، جہاں ویسٹ انڈیز کی گرم اور مرطوب موسمی صورتحال کو مدنظر رکھتے ہوئے خصوصی تیاری کی گئی۔
انہوں نے بتایا کہ کھلاڑیوں کو گرین وکٹوں اور اسپن ٹریکس دونوں پر بھرپور پریکٹس کرائی گئی، جبکہ ٹرینیڈاڈ میں شیڈول چار روزہ وارم اپ میچ بھی ٹیم کو مقامی حالات سے ہم آہنگ ہونے میں مدد دے گا۔
سرفراز احمد نے حالیہ کارکردگی پر گفتگو کرتے ہوئے کہا کہ نتائج توقعات کے مطابق نہیں رہے، اسی لیے ہر کھلاڑی سے الگ ملاقات کرکے ان کی ذمہ داریوں اور اہداف پر بات کی گئی ہے۔
انہوں نے بابر اعظم کو دوبارہ ٹیسٹ ٹیم کی قیادت سنبھالنے پر مبارکباد دیتے ہوئے کہا کہ بابر ایک باصلاحیت اور تجربہ کار کپتان ہیں، جبکہ پوری ٹیم کا ہدف ویسٹ انڈیز کے خلاف سیریز میں کامیابی حاصل کرنا ہے۔
