پاکستان شوبز انڈسٹری کی معروف اداکارہ مریم نفیس نے کہا ہے کہ گھروں میں ساس اور بہو کے درمیان پیدا ہونے والے اکثر مسائل کی بنیادی وجہ یہ ہوتی ہے کہ ساس خود کو ہمیشہ درست جبکہ بہو کو ہر معاملے میں غلط تصور کرتی ہے۔
ایک نجی ٹی وی کے مارننگ شو میں گفتگو کرتے ہوئے اداکارہ نے خاندانی نظام، سسرال کے معاملات اور ساس بہو کے تعلق پر کھل کر اظہارِ خیال کیا۔
مریم نفیس کا کہنا تھا کہ بہو پر سسرال کی خدمت کی مکمل ذمہ داری ڈال دینا درست نہیں، جبکہ اسلامی تعلیمات میں بھی شادی کے بعد بچوں کو الگ اور آزاد زندگی گزارنے کا موقع دینے پر زور دیا گیا ہے۔
اداکارہ نے بتایا کہ اگرچہ ان کا بیٹا عیسیٰ ابھی بہت چھوٹا ہے، لیکن وہ ذہنی طور پر پہلے ہی یہ فیصلہ کرچکی ہیں کہ شادی کے بعد اسے الگ گھر بسانے کی آزادی دیں گی۔
انہوں نے مزید کہا کہ اگر کسی خاندان کے مالی حالات الگ گھر لینے کی اجازت نہ دیں تو کم از کم بہو کو گھر کے اندر اتنی آزادی ضرور ہونی چاہیے کہ وہ اپنا علیحدہ کچن بنا سکے اور اپنی مرضی سے زندگی گزار سکے۔
واضح رہے کہ مریم نفیس کی شادی فلم ڈائریکٹر امان احمد سے ہوئی تھی اور دونوں ایک بچے کے والدین ہیں۔
