کراچی: منشیات فروشی کے الزام میں گرفتار انمول عرف پنکی سے متعلق تفتیش کے دوران ایک اور مبینہ آڈیو پیغام سامنے آیا ہے جس میں وہ اپنے نیٹ ورک سے متعلق اہم دعوے کرتی سنائی دیتی ہے۔
رپورٹس کے مطابق آڈیو میں مبینہ طور پر انمول عرف پنکی کہتی ہے کہ اس کی گرفتاری کے باوجود اس کا کام اسی طرح جاری رہے گا اور نیٹ ورک متاثر نہیں ہوگا۔ آڈیو میں وہ یہ بھی کہتی ہے کہ اگر یہ پیغام سن لیا گیا ہے تو اس کا مطلب ہے کہ یا تو اس کے ساتھ کچھ ہوچکا ہے یا وہ زندہ نہیں رہی۔
مبینہ ریکارڈنگ میں ملزمہ یہ دعویٰ بھی کرتی ہے کہ آئندہ تمام معاملات ایک مرد کے ذریعے چلائے جائیں گے اور نئے نمبر کے ذریعے رابطہ جاری رہے گا، جبکہ چند دن بعد پرانا نمبر بھی دوبارہ فعال کردیا جائے گا۔
ذرائع کے مطابق ایک اور مبینہ آڈیو میں پولیس اہلکار کامران کا بھی ذکر سامنے آیا ہے، جو جناح اسپتال چوکی میں تعینات تھا۔ دعویٰ کیا گیا ہے کہ اس اہلکار نے مبینہ طور پر 30 لاکھ روپے کے عوض ملزمہ کے بھائی ناصر کی رہائی میں کردار ادا کیا۔
ایک اور آڈیو میں ناصر نامی شخص نے بھی دعویٰ کیا ہے کہ اسے اسپتال کے ایک کمرے میں رکھا گیا تھا جہاں سے بعد میں اسے منتقل کیا گیا۔
پولیس اور متعلقہ ادارے ان آڈیوز کی مزید تصدیق اور تحقیقات میں مصروف ہیں، جبکہ کیس سے جڑے مختلف پہلوؤں کی چھان بین جاری ہے۔
