پشاور: خیبر پختونخوا میں حالیہ بارشوں اور فلش فلڈ کے باعث اب تک مختلف حادثات میں 393 افراد جان کی بازی ہار گئے جبکہ 190 افراد زخمی ہوئے ہیں۔
پی ڈی ایم اے کی رپورٹ کے مطابق جاں بحق افراد میں 300 مرد، 53 خواتین اور 40 بچے شامل ہیں جبکہ زخمیوں میں 145 مرد، 27 خواتین اور 18 بچے ہیں۔
موسلا دھار بارش اور فلش فلڈ کی وجہ سے صوبے کے 1618 گھر متاثر ہوئے ہیں، جن میں سے 1185 گھر جزوی طور پر اور 433 گھر مکمل طور پر منہدم ہوئے۔ سب سے زیادہ متاثرہ ضلع بونیر ہے جہاں 234 افراد ہلاک اور صوابی میں 42 جاں بحق ہوئے۔ دیگر متاثرہ اضلاع میں سوات، باجوڑ، مانسہرہ، شانگلہ، دیر لویر اور بٹگرام شامل ہیں۔
پی ڈی ایم اے نے متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری امداد فراہم کرنے کی ہدایت کی ہے۔ ایمرجنسی آپریشن سینٹر مکمل فعال ہے اور عوام کسی بھی حادثے یا موسمی صورتحال کی معلومات کے لیے فری ہیلپ لائن 1700 پر رابطہ کر سکتے ہیں۔
