اسلام آباد: اقتصادی رابطہ کمیٹی نے یوٹیلیٹی اسٹورز کے واجبات، ملازمین کے معاوضے اور بقایاجات فوری ادا کرنے کی ہدایت جاری کر دی ہے۔
وزیر خزانہ محمد اورنگزیب کی صدارت میں ہونے والے اجلاس میں وفاقی وزرا رانا تنویر حسین، جام کمال خان اور دیگر نے شرکت کی۔ ای سی سی نے یوٹیلیٹی اسٹورز کارپوریشن کی بندش کے سلسلے میں 30.216 ارب روپے کا پیکج منظور کیا اور اسٹورز کے ملازمین کے لیے پیکج کی سمری وزارت صنعت و پیداوار نے پیش کی۔
اجلاس میں فیصلہ کیا گیا کہ بندش کا عمل شفاف اور منظم انداز میں مکمل کیا جائے، اور اس کے لیے یوٹیلیٹی اسٹورز کے اثاثے رواں مالی سال فروخت کیے جائیں گے۔ اثاثوں کی فروخت سے حاصل ہونے والی آمدن بندش کے اخراجات پورے کرنے کے لیے استعمال کی جائے گی۔
ای سی سی نے واضح کیا کہ ملازمین کے حقوق اور فلاح و بہبود کا تحفظ حکومت کی اولین ترجیح ہے اور تمام واجبات اور بقایاجات فوری ادا کیے جائیں گے۔
