اسلام آباد: ملک میں یکم اکتوبر سے پیٹرولیم مصنوعات مزید مہنگی ہونے کا امکان ہے۔ آئل انڈسٹری کی جانب سے قیمتوں سے متعلق ورکنگ مکمل کر لی گئی ہے، جس کے مطابق پیٹرول، ڈیزل، لائٹ ڈیزل اور مٹی کے تیل کی قیمتوں میں اضافہ متوقع ہے۔
ذرائع کے مطابق پیٹرول کی قیمت میں فی لیٹر ایک روپیہ 97 پیسے، ہائی اسپیڈ ڈیزل میں 2 روپے 48 پیسے، لائٹ ڈیزل میں ایک روپیہ 76 پیسے اور مٹی کے تیل میں 4 روپے 65 پیسے فی لیٹر اضافہ تجویز کیا گیا ہے۔
اوگرا قیمتوں کی ورکنگ پیٹرولیم ڈویژن کے ذریعے وزارتِ خزانہ کو بھیجے گی، جس کے بعد وزیراعظم کی منظوری کے تحت وزارتِ خزانہ کل نئی قیمتوں کا حتمی اعلان کرے گی۔
یاد رہے کہ 15 روز قبل حکومت نے پیٹرول کی قیمت برقرار رکھی تھی، تاہم ہائی اسپیڈ ڈیزل کی فی لیٹر قیمت میں 2 روپے 78 پیسے اضافہ کیا گیا تھا۔
