کراچی: خلیج میں جاری کشیدگی اور بحری راستوں میں رکاوٹوں کے باعث پاکستان کی سمندری تجارت میں نمایاں بہتری دیکھی گئی ہے، جبکہ کراچی اور گوادر بندرگاہوں کی اہمیت مزید بڑھ گئی ہے۔
رپورٹس کے مطابق بین الاقوامی شپنگ کمپنیوں نے متبادل راستوں کے طور پر پاکستانی بندرگاہوں کا رخ کرنا شروع کر دیا ہے، جس کے نتیجے میں تجارتی سرگرمیوں میں اضافہ ہوا ہے۔
ہچیسن پورٹس پاکستان کے مطابق متعدد کارگو جہاز پاکستان پہنچ چکے ہیں جبکہ مزید جہازوں کی آمد بھی متوقع ہے، جس سے بندرگاہی آپریشنز میں مزید تیزی آئے گی۔
کراچی میں واقع ٹرمینل پر ہزاروں نئے ٹرانس شپمنٹ کارگو ہینڈل کیے جانے کی توقع ہے، جس کے بعد آئندہ مہینوں میں مجموعی کارگو حجم میں نمایاں اضافہ ہوگا۔
دوسری جانب میری ٹائم حکام کے مطابق خلیجی بحران کے اثرات کے باعث کراچی کے ساتھ ساتھ گوادر پورٹ پر بھی سرگرمیوں میں اضافہ ہوا ہے، جہاں آپریشنل سرگرمیاں پہلے کے مقابلے میں زیادہ ہو گئی ہیں۔
گوادر کو مزید پرکشش بنانے کے لیے مختلف چارجز میں کمی بھی کی گئی ہے، جس کا مقصد تجارتی لاگت کم کر کے بین الاقوامی کاروبار کو راغب کرنا ہے۔
ماہرین کے مطابق پاکستان کا جغرافیائی محلِ وقوع اسے خطے میں ایک اہم ٹرانس شپمنٹ اور لاجسٹکس مرکز بنانے میں مدد دے رہا ہے، جبکہ کراچی، پورٹ قاسم اور گوادر کی اہمیت مستقبل میں مزید بڑھنے کا امکان ہے۔
