کراچی: جوڈیشل مجسٹریٹ جنوبی کی عدالت نے منشیات سے متعلق مختلف مقدمات میں گرفتار ملزمہ انمول عرف پنکی کو ویڈیو لنک کے ذریعے عدالت میں پیش کرنے کی اجازت دے دی ہے۔
عدالت نے پولیس کی درخواست منظور کرتے ہوئے مجموعی طور پر 8 مقدمات میں ملزمہ کی آن لائن پیشی کی اجازت دی۔ عدالتی حکم کے مطابق سیکیورٹی خدشات کے باعث چالان جمع ہونے تک ملزمہ کو جسمانی طور پر عدالت میں پیش کرنا ضروری نہیں ہوگا۔
عدالت نے جیل حکام کو ہدایت جاری کی ہے کہ جب بھی عدالت کی جانب سے طلب کیا جائے، ملزمہ کی حاضری یقینی بنائی جائے۔ اس سلسلے میں جیل انتظامیہ کو واضح احکامات جاری کیے گئے ہیں۔
پولیس نے اپنی درخواست میں مؤقف اختیار کیا تھا کہ ملزمہ کو عدالت لانے کی صورت میں امن و امان کی صورتحال متاثر ہونے کا خدشہ ہے، لہٰذا ویڈیو لنک کے ذریعے پیشی کی اجازت دی جائے۔
عدالت نے پولیس کے دلائل سے اتفاق کرتے ہوئے تھانہ گارڈن میں درج ایک مقدمے، تھانہ گذری کے 6 مقدمات اور تھانہ بغدادی میں درج ایک مقدمے میں ملزمہ کی ویڈیو لنک کے ذریعے پیشی کی منظوری دے دی۔
