گلگت: گلگت بلتستان اسمبلی انتخابات 2026 میں خواتین ووٹرز کی اہمیت غیر معمولی طور پر بڑھ گئی ہے، جہاں کئی حلقوں میں مرد اور خواتین ووٹرز کی تعداد کا معمولی فرق بھی انتخابی نتائج کو براہِ راست متاثر کرنے کی صلاحیت رکھتا ہے۔
اعداد و شمار کے مطابق گلگت بلتستان میں خواتین ووٹرز کی مجموعی تعداد 4 لاکھ 54 ہزار 480 ہے، جبکہ کم از کم پانچ حلقوں کو ایسے اہم حلقے قرار دیا جا رہا ہے جہاں خواتین ووٹرز فیصلہ کن کردار ادا کر سکتی ہیں۔
دیامر-1 کو سب سے منفرد حلقہ قرار دیا جا رہا ہے جہاں مرد اور خواتین ووٹرز تقریباً برابر ہیں۔ اس حلقے میں مرد ووٹرز 22 ہزار 269 جبکہ خواتین ووٹرز 22 ہزار 257 ہیں، یعنی دونوں کے درمیان صرف 12 ووٹوں کا انتہائی معمولی فرق موجود ہے۔
اسی طرح گلگت-2 میں مرد ووٹرز کی تعداد خواتین ووٹرز کے مقابلے میں 3 ہزار 829 زیادہ ہے۔ اس حلقے میں خواتین ووٹرز کی تعداد 26 ہزار 10 ریکارڈ کی گئی ہے۔
انتخابی ماہرین کے مطابق گلگت-2، ہنزہ، غذر-2، گلگت-3 اور اسکردو-2 وہ اہم حلقے ہیں جہاں خواتین ووٹرز انتخابی نتائج پر نمایاں اثر ڈال سکتی ہیں۔ ہنزہ میں خواتین ووٹرز 25 ہزار 588، غذر-2 میں 24 ہزار 945، گلگت-3 میں 24 ہزار 810 اور اسکردو-2 میں 24 ہزار 346 ہیں۔
دوسری جانب اس انتخابی عمل میں خواتین امیدواروں کی شمولیت بھی نمایاں ہے، جہاں 8 خواتین مختلف حلقوں سے انتخابات میں حصہ لے رہی ہیں، جو سیاسی میدان میں خواتین کی بڑھتی ہوئی شرکت کو ظاہر کرتی ہے۔
