وزیراعلیٰ پنجاب مریم نواز کی ہدایت پر شہباز شریف اور عاصم منیر کے اعزاز میں خیرمقدمی مہم کا آغاز

لاہور: وزیراعلیٰ پنجاب مریم نواز کی ہدایت پر وزیراعظم شہباز شریف اور فیلڈ مارشل سید عاصم منیر کے اعزاز میں پنجاب کی جانب سے خیرمقدمی مہم کا آغاز کر دیا گیا ہے۔
صوبائی دارالحکومت لاہور میں اہم شاہراہوں، مرکزی راستوں اور چوراہوں پر نصب الیکٹرانک بورڈز پر وزیراعظم شہباز شریف، فیلڈ مارشل سید عاصم منیر، مسلم لیگ (ن) کے صدر محمد نواز شریف اور سعودی ولی عہد شہزادہ محمد بن سلمان کی تصاویر دکھائی گئی ہیں۔
ان بورڈز پر پاکستان اور سعودی عرب کے درمیان دوطرفہ دفاعی اور اسٹریٹجک معاہدے کا خیرمقدم کرتے ہوئے پیغام دیا گیا ہے: “پنجاب آپ کو خوش آمدید کہتا ہے”۔
وزیراعلیٰ مریم نواز کی ہدایت پر چلائی گئی اس مہم میں وزیراعظم شہباز شریف کی عالمی سطح پر کامیابیوں کو بھی سراہا گیا۔
سوشل میڈیا پر بھی “#PakistanRisingStronger” کے عنوان سے ٹرینڈ چلایا جا رہا ہے، جہاں عوام نے وزیراعظم، فیلڈ مارشل عاصم منیر اور سعودی ولی عہد کے کردار کی تعریف کی ہے۔