اسلام آباد: وزیراعظم شہباز شریف نے ملک کے معروف صنعتکاروں اور ممتاز کاروباری شخصیات کے وفد سے ملاقات کی، جس میں آئندہ مالی سال 2026-27 کے بجٹ اور مجموعی معاشی پالیسیوں پر تفصیلی مشاورت کی گئی۔
ملاقات کا مقصد ملکی معیشت کی رفتار کو تیز کرنا اور پالیسی سازی میں کاروباری طبقے کی تجاویز کو شامل کرنا تھا۔
وفد میں میاں محمد منشا، عارف حبیب، عاطف باجوہ، محمد علی تبہ سمیت ملک کی بڑی کاروباری شخصیات شامل تھیں۔
وزیراعظم نے وفد کا خیرمقدم کرتے ہوئے کہا کہ کاروباری برادری پاکستان کی معیشت کی اصل نمائندہ ہے اور حکومت ان کے کردار کو قدر کی نگاہ سے دیکھتی ہے۔ انہوں نے کہا کہ مشکل معاشی حالات میں حکومت کا ساتھ دینے پر کاروباری طبقہ قابلِ تعریف ہے۔
شہباز شریف نے کہا کہ حکومت کی معاشی پالیسیوں کا بنیادی محور برآمدات میں اضافہ اور صنعتی ترقی ہے، جبکہ غیر رسمی معیشت کو ٹیکس نیٹ میں لانے کے لیے بھی اقدامات جاری ہیں۔
انہوں نے مزید کہا کہ آئندہ بجٹ میں عوام کو ریلیف دینے کے اقدامات شامل کیے جا رہے ہیں اور حکومت کا ہدف صنعت، زراعت اور آئی ٹی کے شعبوں کو فروغ دینا ہے تاکہ روزگار کے مواقع بڑھائے جا سکیں۔
وفد کو دی گئی بریفنگ میں بتایا گیا کہ ٹیکس اصلاحات، ٹریبونلز میں بہتری، اسپیشل کمرشل کورٹس کے قیام اور انفراسٹرکچر منصوبوں پر کام جاری ہے، جن میں موٹر ویز اور ریلوے کی اپ گریڈیشن شامل ہے۔
کاروباری وفد نے حکومتی اقدامات پر اعتماد کا اظہار کرتے ہوئے کہا کہ معاشی استحکام کی سمت میں پیش رفت حوصلہ افزا ہے۔ انہوں نے ٹیکس اصلاحات، کاروباری آسانیوں اور ڈیجیٹل معیشت کے فروغ کو سراہا۔
وفد نے آئندہ بجٹ کی تیاری میں مشاورت کو خوش آئند قرار دیا اور حکومت کے ساتھ مکمل تعاون جاری رکھنے کے عزم کا اظہار کیا۔
اجلاس میں وفاقی وزرا اور اعلیٰ حکومتی حکام نے بھی شرکت کی۔
