اسلام آباد: وزیراعظم شہباز شریف سے جاپان کے بین الاقوامی تعاون بینک (JBIC) کے شعبہ مائننگ و میٹل فائنانس کے ڈائریکٹر جنرل تارو کاٹو نے ملاقات کی، جس میں دوطرفہ تعلقات اور سرمایہ کاری کے مواقع پر تبادلہ خیال کیا گیا۔
وزیراعظم نے گفتگو کے دوران کہا کہ پاکستان جاپان کے ساتھ معاشی اور سفارتی تعاون کو انتہائی اہمیت دیتا ہے۔ انہوں نے کہا کہ دونوں ممالک کے درمیان صنعت و تجارت میں ماضی کا اشتراک ہمیشہ مثبت رہا ہے اور پاکستان اس تعاون کو مزید فروغ دینے کے لیے پُرعزم ہے۔
شہباز شریف نے کہا کہ جاپانی سرمایہ کاروں اور بینکوں کو پاکستان میں سرمایہ کاری کے لیے ہر ممکن سہولتیں فراہم کی جائیں گی۔ زراعت، آئی ٹی، ٹیکسٹائل اور دیگر شعبوں میں جاپانی ٹیکنالوجی اور مہارت سے پاکستان نمایاں فوائد حاصل کر سکتا ہے۔ وزیراعظم نے مزید بتایا کہ عالمی مالیاتی ادارے اور سرمایہ کار پہلے ہی پاکستان کے بڑے منصوبوں میں دلچسپی کا اظہار کر رہے ہیں۔
ان کا کہنا تھا کہ پاکستان کی کم لاگت والی افرادی قوت سرمایہ کاروں کو مسابقتی ماحول فراہم کرتی ہے اور حکومت سرمایہ کاروں کے لیے ملک کو مزید پرکشش بنانے کے لیے پرعزم ہے۔
جاپانی ڈائریکٹر جنرل تارو کاٹو نے حکومت پاکستان اور عوام کی مہمان نوازی پر شکریہ ادا کیا اور کہا کہ جاپانی سرمایہ کاروں کی پاکستان میں دلچسپی بڑھ رہی ہے، جاپان مستقبل میں تعاون کو مزید وسعت دینا چاہتا ہے۔
