اسلام آباد: پاکستان سمیت اردن، متحدہ عرب امارات، انڈونیشیا، ترکیہ، سعودی عرب، قطر اور مصر نے امریکی صدر ڈونلڈ ٹرمپ کے مجوزہ امن منصوبے کی تائید کی ہے، جس کا مقصد غزہ میں جنگ بندی، انسانی امداد کی فراہمی، جبری بے دخلی کی روک تھام اور خطے میں امن عمل کو آگے بڑھانا ہے۔
مشترکہ اعلامیے میں کہا گیا ہے کہ مسلم ممالک نے صدر ٹرمپ کی اس یقین دہانی کا خیر مقدم کیا ہے کہ مغربی کنارے کو ضم کرنے کی اجازت نہیں دی جائے گی اور فلسطینی عوام کے تحفظ کو یقینی بنایا جائے گا۔
اعلامیے میں مزید کہا گیا کہ مسلم ممالک امریکا اور دیگر عالمی قوتوں کے ساتھ تعمیری مذاکرات کے لیے تیار ہیں تاکہ منصوبے کو عملی شکل دی جا سکے۔
اس منصوبے میں غزہ کی تعمیر نو، انسانی امداد کی بروقت ترسیل، قیدیوں کی رہائی، اسرائیلی فوجوں کا انخلا اور دو ریاستی حل کے تحت آزاد فلسطینی ریاست کے قیام کی راہ ہموار کرنے کا عزم شامل ہے۔
وزرائے خارجہ نے اس عزم کا اظہار کیا کہ یہ تمام اقدامات بین الاقوامی قوانین کے عین مطابق ہیں اور خطے میں دیرپا امن، سلامتی اور استحکام کے لیے ضروری ہیں۔
