کراچی: وفاقی وزیر داخلہ محسن نقوی نے چیئرمین سنی تحریک محمد ثروت اعجاز قادری سے اہم ملاقات کی، جس میں باہمی احترام اور مذہبی ہم آہنگی کے فروغ پر زور دیا گیا۔
اس موقع پر سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی موجود تھے۔ ملاقات کے دوران علمائے کرام کی خدمات کو خراجِ تحسین پیش کیا گیا۔
محسن نقوی نے واضح کیا کہ مدارس یا مساجد کی بندش سے متعلق افواہیں بے بنیاد ہیں۔ انہوں نے کہا کہ کسی بھی مدرسے یا مسجد کو بند نہیں کیا جائے گا کیونکہ اسلام امن، رواداری اور محبت کا پیغام دیتا ہے۔ ملک میں کسی بھی قسم کی انتہاپسندی یا شرانگیزی کی کوئی جگہ نہیں۔
ان کا کہنا تھا کہ پاکستان ترقی کی راہ پر گامزن ہے، اور موجودہ حالات میں ہر شہری کو اپنا مثبت کردار ادا کرنا ہوگا۔ قانون کے دائرے میں رہ کر احتجاج ہر ایک کا حق ہے مگر ملک کے مفاد میں اتحاد ناگزیر ہے۔
چیئرمین سنی تحریک ثروت اعجاز قادری نے وفاقی وزیر داخلہ کو مذہبی ہم آہنگی کے فروغ کے لیے بھرپور تعاون کی یقین دہانی کرائی۔
