اسلام آباد: سپریم کورٹ کے آئینی بینچ نے پاکستان تحریک انصاف کے رہنما شبلی فراز کی سینیٹ نشست پر الیکشن شیڈول معطل کرنے کی درخواست مسترد کر دی۔
جسٹس امین الدین خان کی سربراہی میں پانچ رکنی بینچ نے کیس کی سماعت کی۔ عدالت نے شبلی فراز کی اپیل منظور کرتے ہوئے پشاور ہائیکورٹ کا فیصلہ کالعدم قرار دے دیا اور ہدایت کی کہ ہائیکورٹ زیر التواء درخواست پر فیصلہ کرے۔
دورانِ سماعت بیرسٹر گوہر علی نے عدالت سے استدعا کی کہ شبلی فراز کی نشست پر ہونے والا سینیٹ الیکشن ملتوی کیا جائے، تاہم عدالت نے یہ درخواست مسترد کر دی۔
جسٹس حسن اظہر رضوی نے ریمارکس دیے کہ جب آپ نے امیدوار نامزد کر دیا ہے تو پھر حکم امتناع کی ضرورت کیوں پیش آئی؟ جس پر جسٹس جمال خان مندوخیل نے کہا کہ امیدوار نامزد کرنا بھی مجبوری تھی۔
عدالت نے واضح کیا کہ سپریم کورٹ سینیٹ کے الیکشن میں مداخلت نہیں کرے گی۔ ساتھ ہی پشاور ہائیکورٹ کو ہدایت کی گئی کہ فریقین کو سننے کے بعد کیس کا فیصلہ کیا جائے۔
