اسلام آباد: سوشل میڈیا پر اپنے منفرد اور فیملی فرینڈلی مواد کی وجہ سے شہرت رکھنے والے کانٹینٹ کریئیٹر طلحہ احمد کا انسٹاگرام اکاؤنٹ مستقل طور پر معطل کر دیا گیا۔
جیو ڈیجیٹل سے گفتگو میں طلحہ کے بھائی طحٰہ احمد نے بتایا کہ انسٹاگرام کی جانب سے اکاؤنٹ معطل کرنے کی وجہ یہ بتائی گئی کہ طلحہ 13 سال سے کم عمر ہیں، حالانکہ ان کی عمر فی الحال 16 سال ہے۔
طحٰہ احمد نے بتایا کہ انسٹاگرام نے اکاؤنٹ بحال کرنے کے لیے شناختی دستاویزات مانگی تھیں جن میں طلحہ کی تصویر اور عمر کی تصدیق موجود ہو، لیکن اسکول کے ڈاکیومینٹس جمع کروانے کے باوجود بھی اکاؤنٹ ابھی تک بحال نہیں ہوا۔
طحہ نے مزید کہا کہ یہ واضح نہیں کہ اکاؤنٹ کسی رپورٹ کی وجہ سے معطل ہوا یا انسٹاگرام نے خود ڈس ایبل کیا، تاہم طلحہ نئے اکاؤنٹ سے جلد دوبارہ سوشل میڈیا پر سرگرم رہیں گے۔
دوسری جانب، طلحہ احمد کے فیس بک اکاؤنٹ پر ان کے فالورز معطل ہونے کے بعد مختلف ردعمل اور تبصرے کر رہے ہیں۔
