اسلام آباد: سابق وزیراعلیٰ خیبر پختونخوا علی امین گنڈاپور کے خلاف شراب اور اسلحہ برآمدگی کیس میں اہم پیشرفت سامنے آئی ہے۔ عدالت نے علی امین گنڈاپور کو گرفتار کرکے پیش کرنے کا حکم دے دیا ہے۔
اسلام آباد کی ڈسٹرکٹ اینڈ سیشن کورٹس میں جوڈیشل مجسٹریٹ مبشر حسن چشتی نے کیس کی سماعت کی۔ سماعت کے دوران علی امین گنڈاپور عدالت میں پیش نہیں ہوئے، جبکہ ان کے وکیل راجا ظہور الحسن بھی حاضر نہ ہوئے۔
عدالت نے مسلسل غیر حاضری پر برہمی کا اظہار کرتے ہوئے سابق وزیراعلیٰ کے ناقابلِ ضمانت وارنٹ گرفتاری جاری کردیے اور پولیس کو حکم دیا کہ علی امین گنڈاپور کو گرفتار کر کے عدالت کے روبرو پیش کیا جائے۔
کیس کی مزید سماعت 11 نومبر تک ملتوی کردی گئی ہے۔ یاد رہے کہ علی امین گنڈاپور کے خلاف تھانہ بارہ کہو میں شراب اور اسلحہ رکھنے کا مقدمہ پہلے سے درج ہے۔
