خیبرپختونخوا اور پنجاب میں بارشوں کی پیشگوئی، بعض علاقوں میں ژالہ باری کا امکان

خیبر پختونخوا کے مختلف حصوں میں موسم گرم اور خشک رہنے کی توقع ہے جبکہ شام کے بعد بالائی علاقوں میں گرج چمک اور تیز ہواؤں کے ساتھ بارش متوقع ہے۔ محکمہ موسمیات کے مطابق آئندہ چوبیس گھنٹوں میں دیر، سوات، چترال، مانسہرہ، کوہستان اور شانگلہ کے مختلف علاقوں میں گرج چمک کے ساتھ بارش کا امکان ہے۔ اسی طرح ایبٹ آباد، بٹگرام اور تورغر میں بھی بعض مقامات پر بارش ہو سکتی ہے۔ اس دوران چند مقامات پر ژالہ باری بھی متوقع ہے۔ گزشتہ روز سیدو شریف سوات میں 14 ملی میٹر بارش اور ژالہ باری ہوئی۔ تیمرگرہ میں 5 ملی میٹر، مالم جبہ میں 21 ملی میٹر، کاکول میں 8 ملی میٹر اور چراٹ میں 3 ملی میٹر بارش ریکارڈ کی گئی۔ محکمہ موسمیات نے پیشگوئی کی ہے کہ لاہور سمیت پنجاب کے کئی اضلاع میں بھی آج تیز ہواؤں کے ساتھ ہلکی بارش کے امکانات ہیں۔