پشاور: وزیراعلیٰ خیبر پختونخوا سہیل آفریدی نے کہا ہے کہ کسی بھی صوبے کو خوراک یا اجناس کی ترسیل روکنے کا آئینی اختیار حاصل نہیں۔
سینیٹ کی قائمہ کمیٹی برائے بین الصوبائی رابطہ کے وفد نے وزیراعلیٰ خیبر پختونخوا سے ملاقات کی، جس میں وفد نے انہیں عہدہ سنبھالنے پر مبارکباد پیش کی۔
اجلاس کے دوران پنجاب حکومت کی جانب سے گندم کی آزاد نقل و حرکت پر پابندیوں کا معاملہ زیر بحث آیا۔ اس موقع پر وزیراعلیٰ سہیل آفریدی نے کہا کہ آئین کے آرٹیکل 151 کے تحت بین الصوبائی تجارت تمام صوبوں کا حق ہے، اور کسی صوبے کو خوراک یا اجناس کی ترسیل میں رکاوٹ ڈالنے کی اجازت نہیں دی جا سکتی۔
انہوں نے کہا کہ سیاسی اختلافات اپنی جگہ مگر عوام کے رزق پر سیاست نہیں ہونی چاہیے۔ سہیل آفریدی نے مزید کہا کہ گندم کے مسئلے کے حل کے لیے بین الصوبائی ہم آہنگی وقت کی ضرورت ہے۔
وفد میں سینیٹر دلاور خان، محسن عزیز، نسیمہ احسان، ناصر محمود، ہدایت اللہ خان، نیاز احمد اور مصدق مسعود سمیت دیگر ارکان شامل تھے، جبکہ ملاقات میں مشیر خزانہ مزمل اسلم، سیکرٹری خوراک شاہ محمود اور دیگر اعلیٰ حکام بھی موجود تھے۔
