راولپنڈی:بانی چیئرمین پاکستان تحریک انصاف نے جی ایچ کیو حملہ کیس میں واٹس ایپ کے ذریعے دیے گئے 10 گواہان کے بیانات کو چیلنج کر دیا ہے۔
عدالت میں جمع کرائی گئی درخواست میں مؤقف اختیار کیا گیا کہ واٹس ایپ لنک پر دیے گئے بیانات قانونی حیثیت نہیں رکھتے، اس لیے جیل ٹرائل کو ختم کرکے مقدمے کی سماعت اوپن کورٹ میں کی جائے۔
درخواست میں مزید کہا گیا کہ جن گواہان کے بیانات ہم نے براہِ راست نہیں سنے، ان پر جرح ممکن نہیں۔ انصاف کے تقاضوں کے لیے ضروری ہے کہ ان گواہوں کو دوبارہ طلب کر کے ان کے بیانات از سرِ نو ریکارڈ کیے جائیں۔
عدالت نے درخواست سماعت کے لیے منظور کرتے ہوئے پراسیکیوٹر کو نوٹس جاری کر دیے اور ہدایت دی کہ فریقین کے وکلا 5 نومبر کو دلائل پیش کریں۔
بعد ازاں بانی پی ٹی آئی کے وکیل فیصل ملک نے عدالت کے باہر میڈیا سے گفتگو میں کہا کہ آج جی ایچ کیو حملہ کیس کی سماعت تھی، عمران خان کی مکمل لیگل ٹیم موجود تھی، تاہم کیس کی کارروائی ملتوی کر دی گئی۔
