بہاولپور (سپیشل رپورٹر)ٹیکنالوجی کالج کے طا لب علم کی پراسرار موت، سکندر بوائز ہاسٹل کے واش روم سے لاش برآمدہوگئی۔ بہاولپور میں ایک افسوسناک واقعہ پیش آیا ہے جہاں ٹیکنالوجی کالج کے الیکٹریکل ڈیپارٹمنٹ سیکنڈ ایئر کے طالب علم محمد مکی کی لاش سکندر بوائز ہاسٹل (پرائیویٹ) کے واش روم سے برآمد ہوئی ۔ریسکیو ذرائع کے مطابق متوفی محمد مکی کا تعلق ہتیجی سے تھا۔ واقعہ کا اس وقت علم ہواجب وہ کافی دیر تک واش روم میں بند رہا۔ ساتھی طالب علم کے مطابق جب واش روم زیادہ دیر تک بند رہا تو شک کی بنیاد پر ہاسٹل وارڈن کو اطلاع دی گئی۔ اطلاع ملنے پر ہاسٹل انتظامیہ نے دروازہ کھولا تو محمد مکی مردہ حالت میں پایا گیا۔ ریسکیو 1122 ٹیم موقع پر پہنچ گئی اور نعش کو ضروری کارروائی کے بعد تھانہ بغداد پولیس کے حوالے کر دیا گیا۔ پولیس اور کرائم سین یونٹ نے موقع سے شواہد اکٹھے کر لیے ہیں جبکہ موت کی اصل وجہ جاننے کے لیے تفتیش جاری ہے۔ ابتدائی اطلاعات کے مطابق واقعے کی نوعیت مشکوک قرار دی جا رہی ہےتاہم حتمی نتیجہ پوسٹ مارٹم رپورٹ کے بعد سامنے آئے گا۔
