اب وقت آگیا، دونوں ممالک کسی نہ کسی شکل میں ایک معاہدے تک پہنچ جائیں، ٹرمپ

واشنگٹن: امریکی صدر ڈونلڈ ٹرمپ نے ایران کو پیغام دیتے ہوئے کہا ہے کہ اب وقت آ چکا ہے کہ دونوں ممالک کسی نہ کسی شکل میں ایک معاہدے تک پہنچیں۔
اپنے تازہ بیان میں صدر ٹرمپ نے کہا کہ ایران گزشتہ 47 برس سے جس پالیسی پر عمل کر رہا ہے، اسے اب مزید جاری رکھنے کی اجازت نہیں دی جا سکتی۔ ان کے مطابق موجودہ صورتحال میں سفارتی حل اور معاہدہ ہی بہترین راستہ ہے۔
ڈونلڈ ٹرمپ نے امریکا اور ایران کے درمیان مذاکرات کے تعطل سے متعلق خبروں کو مسترد کرتے ہوئے کہا کہ دونوں ممالک کے درمیان رابطے اور بات چیت مسلسل جاری ہے اور مذاکرات کا عمل رکا نہیں ہے۔
امریکی صدر کے مطابق مختلف معاملات پر بات چیت جاری ہے، تاہم ابھی یہ کہنا قبل از وقت ہوگا کہ ان مذاکرات کا حتمی نتیجہ کیا نکلے گا۔
انہوں نے مزید کہا کہ اس وقت کوئی بھی یقین سے نہیں کہہ سکتا کہ بات چیت کس سمت جائے گی یا کسی معاہدے کی نوعیت کیا ہوگی، لیکن رابطے برقرار ہیں۔
ٹرمپ کا یہ بیان ایسے وقت میں سامنے آیا ہے جب امریکا اور ایران کے درمیان ممکنہ معاہدے، جوہری پروگرام، علاقائی کشیدگی اور پابندیوں سے متعلق قیاس آرائیاں جاری ہیں۔
عالمی مبصرین بھی ان سفارتی رابطوں پر نظر رکھے ہوئے ہیں کیونکہ کسی بھی پیش رفت کے مشرق وسطیٰ اور عالمی سیاست پر اہم اثرات مرتب ہو سکتے ہیں۔