اسلام آباد میں میڈیا سے گفتگو کرتے ہوئے بانی پی ٹی آئی عمران خان کی بہن علیمہ خان نے قائم مقام چیف جسٹس سردار سرفراز ڈوگر پر تحفظات کا اظہار کیا۔ علیمہ خان کا کہنا تھا کہ عدالت نے وکیل سلمان صفدر کا ایک لمحہ بھی انتظار نہیں کیا اور ججز سماعت کے دوران اٹھ کر چلے گئے۔ انہوں نے مزید کہا کہ ڈوگر صاحب شاید اسی مقصد کے لیے لائے گئے ہیں، ان کی سنیارٹی بھی نہیں تھی، اس لیے ہم ان پر مکمل تحفظات رکھتے ہیں۔
واضح رہے کہ گزشتہ روز اسلام آباد ہائیکورٹ کے قائم مقام چیف جسٹس سرفراز ڈوگر نے عمران خان سے جیل میں ہفتے میں دو دن (منگل اور جمعرات) ملاقات کی اجازت دیتے ہوئے ملاقات کرنے والوں پر میڈیا ٹاک کی پابندی عائد کر دی تھی۔
عدالتی حکم کے مطابق، جو بھی عمران خان سے ملاقات کرے گا، وہ میڈیا سے گفتگو نہیں کرے گا، جبکہ عمران خان کے کوآرڈینیٹر سلمان اکرم راجہ کی فراہم کردہ فہرست کے مطابق مخصوص افراد کو ہی ملاقات کی اجازت ہوگی۔ علاوہ ازیں، بچوں سے ملاقات کے لیے ٹرائل کورٹ میں درخواست دینے کی ہدایت بھی کی گئی۔
