دبئی میں سفری پابندیوں اور ملک بدری سے متعلق قوانین میں سخت تبدیلیاں کر دی گئی ہیں۔
عرب میڈیا کے مطابق دبئی نے ڈی پورٹیشن قوانین کو مزید سخت بنا دیا ہے، جس کا مقصد ان چالاکیوں اور بہانوں کا سدباب کرنا ہے جو بعض افراد ملک بدری سے بچنے کے لیے استعمال کرتے تھے۔
یہ مشاہدہ کیا گیا تھا کہ بعض افراد دبئی سے بے دخلی کے عمل کو مؤخر کرانے کے لیے مالی واجبات، جیسے فرضی قرضوں کا بہانہ بنا کر قانونی سقم سے فائدہ اٹھاتے تھے۔
اس صورتِ حال کے پیش نظر دبئی حکومت نے قانون میں موجود اس نرمی کو مکمل طور پر ختم کرکے نیا قانون متعارف کرایا ہے، جو ایسے حربوں کو ہمیشہ کے لیے روک دے گا۔
مزید برآں، دبئی نے ایک خصوصی عدالتی کمیٹی تشکیل دی ہے جو ان معاملات کا جائزہ لے گی اور قانونی نظام کو مزید مضبوط بنائے گی۔
