عوام پاکستان پارٹی کے سربراہ اور سابق وزیر اعظم شاہد خاقان عباسی نے انکشاف کیا ہے کہ ایم کیو ایم سینٹرل پنجاب کی پوری تنظیم ان کی جماعت میں شامل ہو رہی ہے۔
میڈیا سے گفتگو میں شاہد خاقان عباسی نے بتایا کہ ایم کیو ایم سینٹرل پنجاب کے صدر شاہین گیلانی نے عوام پاکستان پارٹی میں شمولیت کا اعلان کر دیا ہے، اور انہوں نے واضح کیا کہ وہ شاہد خاقان عباسی کے ساتھ مل کر سیاسی سفر جاری رکھیں گے۔
شاہد خاقان عباسی نے ملکی مسائل پر گفتگو کرتے ہوئے کہا کہ حکومت عوامی مشکلات حل کرنے کی صلاحیت نہیں رکھتی، چینی کی قیمت میں اضافہ حکومتی ناکامی کا نتیجہ ہے، جبکہ ن لیگ نے اپنی ہی بنائی ہوئی سولر پالیسی ختم کر دی۔
انہوں نے مزید کہا کہ بجلی کی قیمتوں میں اضافے کی اصل وجوہات ڈالر کی قدر میں اضافہ اور مہنگے آئی پی پیز معاہدے ہیں، اور حکومت کے تحریری معاہدے توڑنے کے سنگین نتائج سامنے آتے ہیں۔
ان کا کہنا تھا کہ پہلے عوام خود سولر پینلز لگاتے تھے، لیکن اب حکومت کو اپنی ناکام پالیسیوں کی وجہ سے یہ قدم خود اٹھانا پڑ رہا ہے۔
انہوں نے انتخابات پر بھی سوال اٹھاتے ہوئے کہا کہ تمام مسائل کی جڑ غیر شفاف الیکشن ہیں، بلوچستان میں پیش آنے والا سانحہ بڑا المیہ ہے، جب تک ان معاملات کی گہرائی میں جا کر ان کا حل نہیں نکالا جاتا، مسائل برقرار رہیں گے۔
