ریاض: سعودی عرب کے جنرل ڈائریکٹوریٹ آف سول ڈیفنس نے شہریوں کو خبردار کیا ہے کہ ملک کے کئی علاقوں میں جاری طوفانی بارشوں کا سلسلہ پیر تک برقرار رہ سکتا ہے۔ عوام کو ممکنہ خطرات سے بچنے کے لیے احتیاطی تدابیر اختیار کرنے کی تاکید کی گئی ہے۔
سعودی پریس ایجنسی کے مطابق، شہریوں کو ہدایت دی گئی ہے کہ وہ محفوظ مقامات پر قیام کریں، وادیوں اور ندی نالوں سے دور رہیں، اور سیلاب زدہ علاقوں میں نہانے سے گریز کریں۔
موسمیاتی پیشگوئی کے مطابق، مکہ اور ریاض میں موسلا دھار بارش متوقع ہے، جس کے نتیجے میں سیلاب، ژالہ باری اور تیز ہوائیں چلنے کا امکان ہے۔ مدینہ، عسیر، حائل اور قصیم کے علاقوں میں بھی شدید بارشوں کی پیشگوئی کی گئی ہے، جبکہ مشرقی صوبے میں درمیانے درجے کی بارشیں متوقع ہیں۔
تبوک، باحہ، جازان اور نجران میں ہلکی سے درمیانی بارش کا امکان ظاہر کیا گیا ہے۔ سول ڈیفنس نے عوام سے اپیل کی ہے کہ وہ سرکاری ذرائع اور سوشل میڈیا کے ذریعے موسمی صورتحال سے باخبر رہیں اور کسی بھی ہنگامی صورتحال میں احتیاط برتیں۔
ادارے نے مزید کہا کہ شہری کسی بھی خطرناک صورتحال میں ہنگامی اداروں سے فوری رابطہ کریں تاکہ بروقت امداد فراہم کی جا سکے۔
