لاہور: وزیر اعلیٰ پنجاب مریم نواز نے کہا ہے کہ صوبے کو مزدوروں کی فلاح و بہبود کے حوالے سے مثالی بنانے کا عزم رکھتے ہیں۔
وزیر اعلیٰ کی زیر صدارت مزدوروں کی فلاح و بہبود سے متعلق مشاورتی اجلاس منعقد ہوا، جس میں مریم نواز نے اہم منصوبوں کی منظوری دیتے ہوئے جامع پلان طلب کر لیا۔ اس کے ساتھ ہی پنجاب بھر میں لیبر کالونیاں بنانے کے لیے بھی اقدامات کی ہدایت جاری کی۔
اجلاس میں مریم نواز نے تاکید کی کہ صوبے میں مزدوروں کو کم از کم 37 ہزار روپے ماہانہ تنخواہ کی ادائیگی یقینی بنائی جائے، جبکہ سوشل سیکیورٹی اسپتالوں کو جدید سہولیات سے آراستہ کرنے کے لیے ان کی ری ویمپنگ کی جائے۔
اس موقع پر فیصلہ کیا گیا کہ لاہور اور راولپنڈی اسلام آباد میں مریضوں کی اسکریننگ کے لیے “مریم نواز ویلنس سینٹر” قائم کیے جائیں گے، جہاں مریضوں کو معائنہ کے بعد بڑے اسپتالوں میں ریفر کیا جائے گا۔ مزید برآں، لاہور کے ڈیفنس روڈ پر 200 بیڈز پر مشتمل “رحمت اللعالمین کارڈیالوجی سینٹر” اور رحیم یار خان میں 50 بیڈز کا نیا سوشل سیکیورٹی اسپتال بنانے کی اصولی منظوری دی گئی۔
اجلاس کے دوران وزیر اعلیٰ پنجاب نے مزدوروں کے حقوق کے تحفظ کے لیے لیبر قوانین میں ترامیم کی ہدایت دیتے ہوئے کہا کہ مزدوروں کی اجرت، صحت، روزگار اور رہائش کی فراہمی حکومت کی اولین ترجیح ہے۔
مریم نواز نے اس عزم کا اظہار کیا کہ صوبے میں کوئی مزدور بھوکا نہ سوئے اور ان کے بچوں کو معیاری تعلیم کے بہتر مواقع فراہم کیے جائیں۔
