اسلام آباد: وزیراعظم شہباز شریف نے صومالیہ میں جاں بحق ہونے والے تین پاکستانی شہریوں کے اہلخانہ کے لیے مالی معاونت سمیت دیگر سہولیات فراہم کرنے کا اعلان کردیا۔
وزیراعظم شہباز شریف نے صومالیہ میں جاں بحق ہونے والے پاکستانی شہری کاشف عمر کے بیٹے اذہان کاشف سے ٹیلیفون پر رابطہ کیا اور ان سے تعزیت کرتے ہوئے اہلخانہ سے ہمدردی کا اظہار کیا۔
اس موقع پر وزیراعظم نے جاں بحق ہونے والے تینوں پاکستانیوں کے بچوں کے لیے مفت تعلیم اور صحت کی سہولیات فراہم کرنے کے ساتھ رہائش گاہ دینے کا بھی اعلان کیا۔
شہباز شریف نے جاں بحق پاکستانی شہریوں کے اہلخانہ کے لیے فی خاندان ایک کروڑ 25 لاکھ روپے مالی معاونت دینے کا اعلان کیا۔
وزیراعظم نے وزارت خارجہ سمیت تمام متعلقہ اداروں کو ہدایت کی ہے کہ کاشف عمر اور دیگر دو جاں بحق پاکستانیوں کے اہلخانہ سے براہ راست رابطہ رکھا جائے اور انہیں ضروری معاونت فراہم کی جائے۔
