کراچی کی مقامی عدالت نے بارش کے دوران کرنٹ لگنے سے شہری کی ہلاکت کے معاملے میں کے الیکٹرک کو ایک کروڑ 35 لاکھ روپے ہرجانہ ادا کرنے کا حکم دے دیا۔
سینئر سول جج وسطی نے فیصلے میں ریمارکس دیے کہ بجلی فراہم کرنے والے ادارے پر شہریوں کے تحفظ کی خصوصی ذمہ داری عائد ہوتی ہے۔ عدالت کے مطابق اگر بجلی کے کھمبے پر دیگر اداروں کی تاریں بھی موجود ہوں تب بھی کے الیکٹرک اپنی ذمہ داری سے دستبردار نہیں ہو سکتی۔
عدالت نے مزید کہا کہ بجلی کی ترسیل کے نظام اور عوامی مقامات کو محفوظ بنانا پاور کمپنی کی بنیادی ذمہ داری ہے جبکہ عوامی مقام پر نصب بجلی کے پول میں کرنٹ آنا واضح غفلت کو ظاہر کرتا ہے۔
عدالت نے کے الیکٹرک کو ہدایت کی ہے کہ وہ 90 روز کے اندر متاثرہ خاندان کو مقررہ ہرجانہ ادا کرے۔
واضح رہے کہ 2019 میں شہری شیخ سعد بارش کے دوران کرنٹ لگنے سے جان کی بازی ہار گئے تھے۔ علاقہ مکینوں نے پہلے ہی پول میں کرنٹ ہونے کی شکایت کی تھی تاہم بروقت کارروائی نہ ہونے پر یہ افسوسناک واقعہ پیش آیا۔
