ملتان (وقائع نگار)خانیوال ہیلتھ آفس میں مبینہ جعلی میڈیکل بل سکینڈل، خزانے کو لاکھوں روپے نقصان پہنچانے کا الزامڈسٹرکٹ ہیلتھ آفس خانیوال میں مبینہ جعلی میڈیکل بل اسکینڈل سامنے آنے کے بعد محکمہ صحت میں تشویش کی لہر دوڑ گئی ہے۔ ذرائع کے مطابق نیوٹریشن سپروائزر، اے ڈی سی ای او اور ایک ہیلتھ افسر پر جعلی میڈیکل بلوں کے ذریعے سرکاری خزانے کو لاکھوں روپے نقصان پہنچانے کے الزامات عائد کیے گئے ہیں۔ذرائع کا کہنا ہے کہ مبینہ طور پر جعلی اور مشکوک میڈیکل بل تیار کروا کر ادائیگیاں حاصل کی گئیں جبکہ اس تمام معاملے میں سی ای او ہیلتھ آفس خانیوال کی مبینہ سرپرستی کا بھی انکشاف ہوا ہے۔ اطلاعات کے مطابق ابتدائی سطح پر بعض دستاویزات اور ریکارڈ میں بے ضابطگیوں کے شواہد سامنے آئے ہیں، جن کے بعد معاملہ مزید سنگین صورت اختیار کر گیا ہے۔ذرائع کے مطابق سرکاری فنڈز کے غلط استعمال اور جعلی بلوں کے ذریعے قومی خزانے پر مبینہ طور پر بڑا ڈاکہ ڈالا گیا، جس کے باعث محکمہ صحت کے اندر احتساب اور شفافیت پر سوالات اٹھنے لگے ہیں۔شہری اور سماجی حلقوں نے مطالبہ کیا ہے کہ معاملے کی فوری، شفاف اور غیر جانبدارانہ تحقیقات کرائی جائیں اور اگر الزامات درست ثابت ہوں تو ذمہ دار افسران و اہلکاروں کے خلاف سخت قانونی و محکمانہ کارروائی عمل میں لائی جائے۔
