سینیٹ قائمہ کمیٹی برائے داخلہ نے مبینہ ڈرگ ڈیلر انمول عرف پنکی کے کیس کا باضابطہ نوٹس لے لیا ہے، جس کے بعد معاملہ پارلیمانی سطح پر بھی زیرِ بحث آگیا ہے۔
اجلاس کے دوران سینیٹر ثمینہ زہری نے اظہار خیال کرتے ہوئے کہا کہ ایک خاتون، جو منشیات کیس میں گرفتار تھی، حالیہ دنوں تک کھلے عام گھومتی رہی، جس پر سوالات اٹھ رہے ہیں۔
کمیٹی کے چیئرمین نے ہدایت دی کہ اینٹی نارکوٹکس فورس (ANF) کے ڈائریکٹر جنرل کو کہا جائے کہ ان لوگوں کی فہرست فراہم کی جائے جنہیں مبینہ طور پر انمول عرف پنکی منشیات فراہم کرتی تھی۔ انہوں نے کہا کہ اگر اس نیٹ ورک میں کسی اعلیٰ عہدے دار کا بھی نام آئے تو اسے بھی شامل کیا جائے اور تمام افراد کو بحالی مرکز بھیجا جائے۔
اجلاس میں سینیٹر سیف اللہ ابڑو نے اسلام آباد میں اغوا کے ایک واقعے کا ذکر کرتے ہوئے سیکیورٹی صورتحال پر تشویش کا اظہار کیا، جبکہ وزیر مملکت طلال چوہدری نے کہا کہ اسلام آباد ملک کا ایک تیزی سے ترقی کرتا ہوا اسمارٹ سٹی ہے جہاں چاروں صوبوں سے لوگ آ کر آباد ہو رہے ہیں۔
سینیٹ کمیٹی نے اس عزم کا اظہار کیا کہ منشیات کے نیٹ ورک کے خلاف سخت کارروائی کی جائے گی اور تمام متعلقہ اداروں کو شفاف تحقیقات یقینی بنانے کی ہدایت دی جائے گی۔
