کراچی: شہر قائد میں مبینہ منشیات فروش انمول عرف پنکی کی گرفتاری کے معاملے نے اس وقت نیا رخ اختیار کرلیا جب ایف آئی آر میں غلط رہائشی پتہ درج ہونے کا انکشاف سامنے آیا، جس کے بعد بلال آرکیڈ کے مکینوں اور انتظامیہ میں شدید تشویش پھیل گئی۔
تفصیلات کے مطابق پولیس نے مقدمے میں دعویٰ کیا تھا کہ ملزمہ کو گارڈن ویسٹ کے بلال آرکیڈ فیز ٹو کے ایک فلیٹ سے گرفتار کیا گیا، تاہم بعد میں معلوم ہوا کہ مذکورہ فلیٹ میں گزشتہ آٹھ سال سے ایک الگ خاندان کرائے پر مقیم ہے۔
متاثرہ خاندان نے مؤقف اختیار کیا ہے کہ ان کا انمول عرف پنکی سے کوئی تعلق نہیں اور نہ ہی وہ اسے جانتے ہیں۔ خاندان کے مطابق پولیس کی مبینہ غفلت کے باعث انہیں شدید ذہنی دباؤ اور سماجی مشکلات کا سامنا کرنا پڑ رہا ہے۔
دوسری جانب بلال آرکیڈ یونین کے نمائندے اور فلیٹ کے مالک سلیم احتجاج کرتے ہوئے گارڈن تھانے پہنچ گئے۔ یونین عہدیدار کے مطابق پولیس نے غلط ایڈریس درج ہونے پر معذرت بھی کی ہے۔
یونین کا کہنا ہے کہ پولیس حکام نے ہدایت دی ہے کہ میڈیا نمائندوں کو فلیٹ میں داخل ہونے یا وہاں رہنے والے افراد سے ملاقات کی اجازت نہ دی جائے۔
ادھر فلیٹ کے مالک نے بھی رہائشی خاندان کو مکان خالی کرنے کا نوٹس جاری کر دیا ہے، جس کے باعث متاثرہ اہلخانہ مزید پریشانی میں مبتلا ہو گئے ہیں۔
بلال آرکیڈ یونین کے عہدیداروں نے مطالبہ کیا ہے کہ پولیس اس معاملے پر میڈیا کے سامنے واضح مؤقف اختیار کرے اور عوامی سطح پر معافی مانگے تاکہ بے گناہ رہائشیوں کی مشکلات کا ازالہ ہو سکے۔
