اسلام آباد: وکیل سلمان صفدر نے 190 ملین پاؤنڈ کیس کے حوالے سے ایک متفرق درخواست عدالت میں دائر کر دی ہے۔
درخواست میں مؤقف اختیار کیا گیا ہے کہ اپیلوں کی پیروی سے متعلق بانی کی جانب سے کوئی واضح ہدایت موجود نہیں، اس لیے اپیل میں پیش رفت کے لیے ضروری ہے کہ پہلے رہنمائی حاصل کی جائے۔
سلمان صفدر نے درخواست میں کہا کہ وہ اپیل کی پیروی خود کریں گے تاہم اس کے لیے بانی سے باضابطہ ہدایات لینا ضروری ہیں، اسی وجہ سے کیس کو فی الحال مؤخر کیا جائے۔
درخواست میں مزید استدعا کی گئی ہے کہ عدالت بانی سے ملاقات کے لیے جیل حکام کو سختی سے احکامات جاری کرے، کیونکہ وکلاء کو ملاقات کی اجازت نہیں دی جا رہی۔
مؤقف میں کہا گیا کہ بانی اور بشریٰ بی بی کے وکلا کو کیس سے متعلق ملاقات کی سہولت نہیں دی جا رہی، جس کے باعث قانونی تیاری متاثر ہو رہی ہے۔
سلمان صفدر نے عدالت سے یہ بھی درخواست کی کہ وکالت نامہ اور ضروری ہدایات حاصل کرنے کے لیے ملاقات کا حکم دیا جائے اور 7 مئی کو ہونے والی اپیلوں کی سماعت ملتوی کی جائے۔
