لاہور کے علاقے مانگا منڈی میں بچوں سے مبینہ زیادتی کے مقدمات میں مطلوب ملزم کی گرفتاری کے لیے سی سی ڈی چوہنگ نے کارروائی کی، جس کے دوران فائرنگ کے واقعے میں ملزم شدید زخمی ہوگیا۔
پولیس کے مطابق سی سی ڈی چوہنگ کی ٹیم نے خفیہ اطلاع پر مانگا منڈی میں ملزم عیش بہادر کی گرفتاری کے لیے چھاپہ مارا۔ کارروائی کے دوران ملزم نے پولیس کو دیکھتے ہی فرار ہونے کی کوشش کی۔
حکام کے مطابق جب پولیس اس کے قریب پہنچی تو ملزم نے اپنے نیفے سے پستول نکالنے کی کوشش کی، تاہم اسی دوران پستول اچانک چل گیا جس کے نتیجے میں وہ خود شدید زخمی ہوگیا۔
پولیس نے زخمی ملزم کو فوری طور پر اسپتال منتقل کر دیا جہاں اسے طبی امداد دی جا رہی ہے۔
سی سی ڈی کے مطابق ملزم عیش بہادر مانگا منڈی کے مقدمہ نمبر 806/26 میں مطلوب تھا، جبکہ دورانِ تفتیش اس نے بچوں کے ساتھ زیادتی کے 35 واقعات کا اعتراف بھی کیا ہے۔
