واشنگٹن: امریکی صدر ڈونلڈ ٹرمپ نے کہا ہے کہ ایران کے ساتھ ممکنہ امن معاہدہ قریب آ سکتا ہے اور مذاکرات میں پیش رفت مثبت سمت میں جاری ہے، جبکہ اسرائیل کی جانب سے حملوں میں کمی کا امکان بھی ظاہر کیا جا رہا ہے۔
امریکی میڈیا کو دیے گئے ایک انٹرویو میں صدر ٹرمپ نے کہا کہ وہ اسلام آباد میں جاری سفارتی مذاکرات کے حوالے سے خاصے پُرامید ہیں اور توقع رکھتے ہیں کہ یہ کوششیں جلد مثبت نتائج دے سکتی ہیں۔
ان کے مطابق خطے میں مجموعی کشیدگی میں کمی کا رجحان دیکھا جا رہا ہے اور اسرائیل بھی اپنے حملوں میں کمی کرے گا۔
ڈونلڈ ٹرمپ نے مزید کہا کہ ایرانی قیادت مذاکرات کے دوران نسبتاً لچکدار اور معقول رویہ اختیار کر رہی ہے، تاہم اگر معاہدہ طے نہ پایا تو صورتحال مزید بگڑ سکتی ہے اور نتائج انتہائی تکلیف دہ ہو سکتے ہیں۔
انہوں نے یہ بھی انکشاف کیا کہ اسرائیلی وزیراعظم بینجمن نیتن یاہو نے حالیہ ٹیلیفونک گفتگو میں لبنان پر حملوں میں کمی پر آمادگی ظاہر کی ہے۔
صدر ٹرمپ کے مطابق ایران کے ساتھ جاری مذاکرات میں دونوں فریقین سنجیدگی کا مظاہرہ کر رہے ہیں، جو ایک ممکنہ امن معاہدے کی راہ ہموار کر سکتا ہے۔
انہوں نے کہا کہ اگر یہ سفارتی کوششیں کامیاب ہو جاتی ہیں تو یہ پیش رفت نہ صرف خطے بلکہ عالمی امن کے لیے بھی انتہائی اہم ثابت ہوگی۔
