انسداد دہشت گردی عدالت میں بانی پی ٹی آئی عمران خان کی بہن علیمہ خان کی پیشی کے بعد ان کے وارنٹ گرفتاری منسوخ کر دیے گئے، جبکہ ان پر فردِ جرم عائد کرنے کے لیے نئی تاریخ مقرر کر دی گئی ہے۔
ذرائع کے مطابق یہ مقدمہ 26 نومبر کے احتجاج سے متعلق تھانہ صادق آباد میں درج کیا گیا تھا۔ علیمہ خان آج عدالت میں پیش ہوئیں تو جج امجد علی شاہ نے ان کے وارنٹ گرفتاری منسوخ کرنے کا حکم دیا۔
سماعت کے دوران فردِ جرم عائد نہیں ہو سکی کیونکہ علیمہ خان کے وکیل عدالت میں موجود نہیں تھے۔ ملزمہ نے مؤقف اختیار کیا کہ ان کے وکیل کی غیر موجودگی میں کارروائی مؤخر کی جائے۔
عدالت نے درخواست منظور کرتے ہوئے سماعت پیر 13 اکتوبر تک ملتوی کر دی۔ ساتھ ہی دو غیر حاضر ملزمان، عاطف ریاض اور اکرام کے وارنٹ گرفتاری جاری کر دیے گئے۔
عدالت نے ہدایت کی کہ علیمہ خان آئندہ سماعت پر لازمی طور پر عدالت میں پیش ہوں تاکہ فردِ جرم عائد کرنے کی کارروائی مکمل کی جا سکے۔
