اسلام آباد: انسداد دہشت گردی عدالت نے بانی پی ٹی آئی عمران خان کی ویڈیو لنک کے ذریعے پیشی سے متعلق سخت ایس او پیز جاری کردی ہیں۔ یہ ایس او پیز عدالتِ عالیہ کے حکم کے پیرا 11 اور 12 کے مطابق تیار کی گئی ہیں اور انہیں عدالت کے اندر اور باہر نمایاں مقامات پر آویزاں کیا جائے گا۔
عدالتی اعلامیے کے مطابق ویڈیو لنک کارروائی کی ریکارڈنگ کا اختیار صرف عدالت کو ہوگا، کسی اور فرد یا ادارے کو اس کی اجازت نہیں دی جائے گی۔ عدالت کے اندر موبائل فون یا کسی بھی ریکارڈنگ ڈیوائس لے جانے پر مکمل پابندی عائد کر دی گئی ہے۔
ایس او پیز میں مزید واضح کیا گیا ہے کہ اگر کوئی شخص خفیہ طور پر ریکارڈنگ کرتا ہوا پایا گیا تو اس کے خلاف فوجداری قوانین کے تحت کارروائی کی جائے گی۔ اسی طرح ویڈیو لنک کارروائی کا ٹرانسکرپٹ کسی کو بھی فراہم نہیں کیا جائے گا۔
