اسلام آباد: انسداد دہشت گردی عدالت میں عمران خان کی نااہلی کے بعد فیض آباد احتجاج کیس کی سماعت ہوئی، جہاں عدالت نے پی ٹی آئی رہنما عامر کیانی کے خلاف اشتہاری کارروائی ختم کرنے کا حکم دے دیا۔
جج طاہر عباس سپرا نے کیس کی سماعت کی، اس دوران پی ٹی آئی سینیٹر فیصل جاوید خان، راشد حفیظ اور دیگر رہنما عدالت میں موجود تھے۔ عدالت نے قرار دیا کہ عامر کیانی کے خلاف اب اشتہاری کارروائی نہیں رہے گی، تاہم علی امین گنڈا پور اسی مقدمے میں پہلے ہی اشتہاری قرار دیے جا چکے ہیں۔
سماعت کے دوران گواہان کی شہادتیں قلمبند نہ ہو سکیں جس کے باعث عدالت نے مزید کارروائی 24 ستمبر تک ملتوی کر دی۔
یاد رہے کہ فیصل جاوید خان، واثق قیوم، راشد حفیظ اور دیگر پی ٹی آئی رہنماؤں کے خلاف اسی مقدمے میں ٹرائل بدستور جاری ہے، یہ مقدمہ تھانہ انڈسٹریل ایریا میں درج کیا گیا تھا۔