واشنگٹن: امریکی صدر ڈونلڈ ٹرمپ نے کہا ہے کہ وہ پاکستان اور بھارت کے ساتھ مل کر مسئلہ کشمیر کا کوئی پائیدار حل تلاش کرنے کی کوشش کریں گے۔ اپنے حالیہ بیان میں صدر ٹرمپ کا کہنا تھا کہ امریکا دونوں ممالک کے ساتھ نہ صرف سفارتی سطح پر تعلقات کو مزید مضبوط بنائے گا بلکہ تجارتی شعبے میں بھی تعاون کو وسعت دی جائے گی۔ ٹرمپ نے دعویٰ کیا کہ پاکستان اور بھارت کے درمیان حالیہ کشیدگی کے خاتمے میں امریکا نے اہم کردار ادا کیا اور دونوں فریقین کو مذاکرات کی میز پر لا کر جنگ بندی پر راضی کیا۔ اس ضمن میں ٹرمپ نے سوشل میڈیا پر جاری بیان میں جنگ بندی کے معاہدے کی تصدیق بھی کی۔ یاد رہے کہ بھارت کی حالیہ اشتعال انگیزی کے جواب میں پاکستان نے آپریشن “بُنيان مرصوص” کے دوران 10 سے زائد بھارتی اہداف کو کامیابی سے نشانہ بنایا تھا، جس کے بعد خطے کی صورتحال مزید کشیدہ ہو گئی تھی۔ ٹرمپ کا یہ بیان ایسے وقت پر سامنے آیا ہے جب کشمیر کا تنازع عالمی برادری کی توجہ حاصل کر چکا ہے اور اقوام متحدہ سمیت کئی ممالک اس مسئلے کے پرامن حل کے لیے کوشاں ہیں۔
