لاہور: وزیر اعلیٰ پنجاب مریم نواز نے وزیر اعظم شہباز شریف کے یوم تشکر منانے کے فیصلے کا خیرمقدم کیا۔ مریم نواز شریف نے اپنے بیان میں کہا کہ ہم اللہ تعالیٰ کے شکر گزار ہیں کہ دشمن کے ناپاک عزائم کو ناکام بنایا، آج کا دن شکرگزاری کا نہیں بلکہ قومی عزت، حوصلہ اور یکجہتی کی کامیابی کا دن ہے۔ مریم نواز نے مزید کہا کہ پاک فوج ایک عظیم، پیشہ ور اور قابل ادارہ ہے، جس نے بھارتی جارحیت کا جواب صرف طاقت سے نہیں بلکہ حکمت کے ساتھ دیا۔ انہوں نے کہا کہ شاہینوں نے دشمن کے طیارے گرا کر دنیا کو یہ پیغام دیا کہ پاکستان کا دفاع ناقابل تسخیر ہے، اور دنیا نے یہ جان لیا کہ پاکستان اپنے دفاع میں کسی بھی قیمت پر پیچھے نہیں ہٹے گا۔ مریم نواز نے کہا کہ ہمارے جوانوں نے دشمن کی آنکھوں میں آنکھیں ڈال کر یہ دکھایا کہ پاکستان امن کا خواہاں، مگر کمزور یا بزدل نہیں ہے۔ پاکستان کی قیادت مخلص ہے، قوم متحد ہے، اور افواج ناقابل شکست ہیں۔ مریم نواز نے مزید کہا کہ ہم اپنے شہداء کی قربانیوں کو ضائع نہیں جانے دیں گے، اور ہم نوجوانوں کو تعلیم، ہنر اور ٹیکنالوجی سے آراستہ کر کے ایسا پاکستان بنائیں گے جسے کوئی دشمن میلی آنکھ سے بھی نہیں دیکھ سکے گا۔
