سری نگر: بھارتی حکومت نے اسرائیل کی طرح مقبوضہ جموں و کشمیر میں آزادی پسند کشمیریوں کے گھروں کو مسمار کرنا شروع کر دیا
بھارتی حکومت نے مقبوضہ جموں و کشمیر میں کشمیریوں کے مکانات کو گرانا شروع کر دیا ہے۔ کشمیر میڈیا سروس کی رپورٹ کے مطابق بھارتی فوج نے حالیہ چند دنوں میں کم از کم 11 مکانات کو دھماکہ خیز مواد سے تباہ کر دیا ہے۔
ماہرین کا کہنا ہے کہ بھارتی فوج، اسرائیلی فوج کی حکمت عملی پر عمل کرتے ہوئے کشمیریوں کے گھروں کو تباہ کر رہی ہے تاکہ انہیں بے گھر کیا جا سکے اور بھارتی قبضے کے خلاف مزاحمت کرنے والے افراد کا حوصلہ توڑا جا سکے۔
کشمیر میڈیا سروس کی رپورٹ کے مطابق، دھماکہ خیز مواد سے تباہ کیے گئے مکانات کی وجہ سے قریب واقع عمارتوں اور مکانات کو بھی نقصان پہنچ رہا ہے۔
مقبوضہ کشمیر کی سابق وزیر اعلیٰ محبوبہ مفتی نے بھارتی حکومت پر کشمیریوں کے گھروں کی منہدم کرنے کا الزام عائد کرتے ہوئے کہا ہے کہ حکومت دہشت گردوں اور عام شہریوں میں فرق کرے۔ انہوں نے مزید کہا کہ بے گناہ افراد کو اس ظلم کا شکار ہونے سے بچایا جائے۔
محبوبہ مفتی نے کہا کہ حکومت کو ان بے گناہ افراد سے دور نہیں ہونا چاہیے جو دہشت گردی کے خلاف ہیں اور جن کے گھروں کو بلاوجہ تباہ کیا جا رہا ہے۔ انہوں نے اس بات پر زور دیا کہ حکام اس بات کو یقینی بنائیں کہ بے گناہ شہری اس عمل کا شکار نہ ہوں۔
