پاکستانی فضائی حدود کی بندش کو 24 گھنٹے مکمل ہوچکے ہیں، جس کے نتیجے میں بھارتی ایئرلائنز کی 70 سے 85 پروازیں اضافی دو سے تین گھنٹے طویل سفر کرنے پر مجبور ہوئیں۔
ذرائع کے مطابق گزشتہ 24 گھنٹوں میں کئی پروازیں دو سے دس گھنٹے تاخیر کا شکار ہوئیں، جس کے باعث ایئرلائنز کو اضافی فیول، ایئرپورٹ پارکنگ، اور ہوٹل اخراجات جیسے مدوں میں لاکھوں روپے کا بوجھ برداشت کرنا پڑ رہا ہے۔
تاخیر سے متاثرہ دو طرفہ پروازوں میں امریکہ، کینیڈا اور برطانیہ جانے والی پروازیں شامل ہیں جبکہ جرمنی، سعودی عرب، ڈنمارک، ہالینڈ اور سوئٹزرلینڈ کی پروازیں بھی گھنٹوں تاخیر کا سامنا کر رہی ہیں۔
بحرین، مسقط، باکو، شارجہ اور دبئی جانے والی پروازوں پر بھی اضافی فیول اخراجات اور طویل وقت کا اثر پڑا ہے۔
ذرائع کے مطابق پاکستانی فضائی حدود کی بندش کا اثر بھارت کی پانچ کمرشل ایئرلائنز، خصوصی پروازوں اور چارٹرڈ فلائٹس پر بھی پڑا ہے۔
