وزیر اطلاعات پنجاب عظمیٰ بخاری نے اپنے بیان میں کہا ہے کہ تھیٹرز کے ذریعے فحاشی اور بے حیائی پھیلانے کی ہرگز اجازت نہیں دی جائے گی۔
انہوں نے کہا کہ وفاقی حکومت کی جانب سے تھیٹرز کے مالکان کو انڈرٹیکنگ کے مطابق تھیٹرز چلانے کی پابندی عائد کی گئی ہے۔ جو تھیٹر مالکان اس شرط کی خلاف ورزی کریں گے، انہیں تھیٹر چلانے کی اجازت نہیں ملے گی۔
عظمیٰ بخاری نے مزید کہا کہ اسٹیج اداکاروں اور اداکاراؤں کو بھی اپنی ذمہ داری کا احساس کرتے ہوئے تھیٹرز کو فیملی فرینڈلی بنانے میں اپنا کردار ادا کرنا چاہیے۔ عید کے موقع پر شہریوں کو معیاری اور تفریحی مواد فراہم کیا جانا چاہیے۔
وفاقی وزیر نے غیر قانونی اور بغیر لائسنس تھیٹرز چلانے والوں کو سخت انتباہ دیتے ہوئے کہا کہ ایسے تھیٹرز کے خلاف فوری کارروائی کی جائے گی۔ انہوں نے کہا کہ پنجاب میں غیر قانونی تھیٹرز کو چلانے والوں کے خلاف سخت قانونی کارروائی کی جائے گی۔
عظمیٰ بخاری نے یہ بھی کہا کہ تمام اضلاع کے ڈپٹی کمشنرز اور ضلعی انتظامیہ پنجاب آرٹ کونسل کے نمائندوں کے ساتھ تعاون کریں تاکہ جو تھیٹرز پالیسی اور ایس او پیز کی خلاف ورزی کریں، ان کے خلاف بروقت کارروائی کی جا سکے۔
انہوں نے یہ بھی اعلان کیا کہ وہ خود بھی جلد پنجاب کے مختلف اضلاع کے تھیٹرز کا سرپرائز وزٹ کریں گی۔
