وزیرِاعظم شہباز شریف اور امیرِ قطر کا رابطہ، دوطرفہ تعلقات اور باہمی تعاون پر تبادلہ خیال

اسلام آباد: وزیرِاعظم محمد شہباز شریف نے قطر کے امیر، عزت مآب شیخ تمیم بن حمد الثانی سے ٹیلیفونک گفتگو کی، جس میں انہیں عیدالفطر کی پُرخلوص مبارکباد پیش کی۔
وزیرِاعظم ہاؤس سے جاری بیان کے مطابق، دونوں رہنماؤں نے پاکستان اور قطر کے درمیان دیرینہ برادرانہ تعلقات پر اطمینان کا اظہار کرتے ہوئے سیاسی، اقتصادی اور ثقافتی شعبوں میں دوطرفہ تعاون کو مزید فروغ دینے کے عزم کا اعادہ کیا۔
گفتگو کے دوران عالمی و علاقائی امور پر بھی تبادلہ خیال ہوا۔ وزیرِاعظم شہباز شریف نے غزہ میں امن کے قیام کے لیے امیرِ قطر کی مؤثر کوششوں اور فعال کردار کو سراہا۔
بیان کے مطابق، شیخ تمیم بن حمد الثانی نے وزیرِاعظم پاکستان کی عید مبارکباد کو خوش دلی سے قبول کرتے ہوئے پاکستانی عوام کے لیے نیک تمناؤں کا اظہار کیا۔
امیرِ قطر نے وزیرِاعظم شہباز شریف کا قطر میں منعقدہ “منظر آرٹ گیلری” کی افتتاحی تقریب میں بطور مہمانِ خصوصی شرکت کرنے پر شکریہ ادا کیا، جبکہ وزیرِاعظم نے اس ایونٹ کے انعقاد اور خصوصی دعوت پر امیرِ قطر اور عالی مرتبت شیخہ المیاسہ کا شکریہ ادا کیا۔
امیرِ قطر نے آگاہ کیا کہ قطر سے ایک اعلیٰ سطحی تجارتی و سرمایہ کاری وفد عید کے فوراً بعد پاکستان کا دورہ کرے گا، تاکہ باہمی سرمایہ کاری اور نجی شعبے کے تعاون کو فروغ دیا جا سکے۔
وزیرِاعظم شہباز شریف نے پاکستان اور قطر کے درمیان ثقافتی تعلقات کو مزید مضبوط کرنے کے لیے لاہور میں ایک خصوصی نمائش کے انعقاد کی تجویز دی، جس کا امیرِ قطر نے خیر مقدم کیا۔
گفتگو کے اختتام پر وزیرِاعظم نے عزت مآب شیخ تمیم بن حمد الثانی کو جلد پاکستان کا دورہ کرنے کی دعوت بھی دی۔